> صاحب الياس وصاحب الصوب ملحمة شعرية,

[عبسي الحمديني]

صاحب الياس

كرهت البنات .... وكرهت الصوب والغيات

من تحت راسك


كرهت الغية ...................................وكرهت قولة عزيز عليا

وكرهت حتى الورد يا مدعية ........وكرهت عمر معاك عدى وفات

وكرهت يوم ناديتلك غاليا ................تريتك مصيبة مغلفة بزينات


فى الصوب كرهتينى ................. فى حالة عطيبة اليوم خليتينى

درت الغلا نحساب بتهنينى ............... تريتك نكد وموجعة وأهات

مشيت الطريق وراك بهدلتينى ........ يكفى جروح بنعيد الحسابات


فرحان كنت زاهى بيك ...................ياما ليالى الفكر سارح فيك

نشاكى القمر ونجبده طاريك.... ......وياما سهرت نعد فى النجمات

تجينى فى خيالى ملايكة نلاقيك ........وينشد عليك العقل كل اوقات

ولو فيه من يقبل دفاع عليك ....... يكّذب اليوم شن قلت من كلمات



صاحب الصوب

خيرهن البنات .... وخيره سريب الصوب والغيات

رايك عطيب


شن عرفك فى الغية ....................وشن عرفك معنى عزيز عليا

وشن قربك يالا وريدة شذية .............وانت غشيم وحالتك حالات

مش كل من كلم فى يوم بنية .......... حسبها غرام ودارها حكايات


فى الصوب تحكى بروحك ............فى حال رزية بهبلتك وميوحك

فوق رمال عليت عالى صروحك ........حسبته قوى يتحمل الهزات

رايك عطيب منه تعانى جروحك ..........تخيلت قصة عشتها كذبات


غير كيف تزهى بيها ....................مرهون لاهى ليك لا انت ليها

ما ادير عيبة تجبده طاريها ............وانكان تجبده روزها الكلمات

خليك حقى فى الكلام عليها ...............وردة شذية مفوّحة جنانات

خطم لسانك عالزهر واحكيها ......... كلمات زينة بوصفهن وردات



صاحب الياس


الغية ما هى علوم صعيبة ......... ولا هى طلاسم عل العقول غريبة

بقولة غشيم داير معاى العيبة ........تنصح الغير وادير فى الزلات

ذقت المواجع من فراق حبيبة ..... ما تقول صاحب ياس وسوايات


من قالك اللى عشقتها مرهون ..........وشن عرفك حبه عليا يهون

غاليته غلا ما يلتقى فى الكون .........سكر ابوابه فى همومى نبات

مانى عطيب لايوم فيه انكون ......... لسانى عفيف ما يذكر العيبات


ما عبت فى وردات بلادى .......... ولا ذكرتهن بالسو جاى وغادى

منهن الزينة مقصدى ومرادى ..... وفيهن بنات سماح فى الصفات

كلامى عا اللى حبها صرهادى ....... ..ووصفتها بحروف موزونات



صاحب الصوب


يا بو ياس غيرته كلامك .................. جيت اليوم بحكاوى غرامك

نكرت القول من خوفة ملامك ............... كانن عوج ولولك زينات

كان صدقت ترفع من مقامك ............. وانكان كذب مشناها صفات


عشت الدور حقانى حسبته .............. حبك ضاع بأوهامك خسرته

ولما أيست من قربه نكرته ............ وجيت اليوم تغنى عل البنات

وكميته كره فى قلبك طمرته ..............واللى كرّه فى شط الهم بات

انسى صوب اللى قلت درته .........ان شاء الله تكون نادم على فات

يعطى المولى فى يوم تلاقيه .................بود تحط ايدياتك فى ايديه

ترمى الياس وراك وتعديه .......... وتلحق اصحاب الصوب والغيات

وتكتب اشعارك بالمحبة عليه ....... وتنصح اصحاب الياس والآهات


غير دير عزم