مواضيع ساخنة تحتاج الى النقاش

[BLOODY ROAR]

بسم الله الرحمن الرحيم

اليوم انى ( اخوكم قن ) حبيت نقترح الموضوع هدا ودالك لانه فيه مواضيع كثيرة تحتاح الى نقاشات وحبيت ايضا انه مايكونش دخولنا للمنتدى مجرد وضع مواضيع او كوبى بيست او مواضيع مضحكة لانه فيه مواضيع اهم او تحتاج للنقاش

يعنى باش مانطولش عليكم فى الموضوع هدا تتم مناقشة جميع المواضيع المهمة اللى يمر بيها الانسان يوميا والمشاكل اللى قاعدة تصير من فهم بعض المواضيع بشكل خاطى

قبل ماتشاركو بردودكم اللى حتكون مهمة بالنسبة لى ولكم فيه شوية شروط ارجو ان نقوم بها

اولا
يجب ان يكون النقاش فى حدود الاحترام ( يعنى لو كان الموضوع حساس رجاء التركيز على المفردات والالفاظ للحفاظ على رونق الموضوع واهميته)

تانيا

بالنسبة للايجابات اولا تكون من ناحية علمية او بعدها رايك الشخصى ( بحيث تتم الاستفادة من الناحيتين)

طبعا كل موضوع يقعد اسبوع
من وجهة نظرى وقت كافى لنحصد ثمرة النقاشات والحوارات اللى تناولناها على الموضوع

او كل اسبوع موضوع جديد

او موضوع الاسبوع هدا على القضاء والقدر


يلا مانطولش عليكم او مستنى اول مشاركة على الموضوع او ياريت المشاركة ماتكونش طويلة حتى تكون ساهلة فى القراءة وتخلى مجال للاخرين انهم يعطو رايهم

[MAD_MAN]

القضاء والقدر
أنا مؤمن بالشي هذا تماما ً
وهو شي لا مفر فيه
أحيانا يشعر الانسان بانه مسير لا مخير
هذا والله اعلم
=====
مشكور على طرحك الموضوع gun

[BLOODY ROAR]

كلام جميل ماد مان
..........................

المشكلة فيه ناس توة مش مدايره اهمية للموضوع هدا يعنى مثلا

واحد ضرباته سيارة او مات

تلقى امه تعيط :l7: وتقول مالقتش السيارة امته تضربه الا اليوم :(

لا والمشكلة تلقاها تعيط :l7: او تندب او تلطم فى وجهها وتقول كان طيب او كان كويس اهو مرات كان خانب او يشرب خمر
يعنى هنايا المشكلة اصبحت كفر بالقضاء والقدر او عدم الايمان بيه او كدب او نفاق اجتماعى

المفروض لما ايصير موقف زى هدا الواحد ايقول الله يرحمه او هادى ارادة الله او هدا اجله ويدعيله بالخير او يقرا قران مش ايعيط او يلطم ويقول مالقتش السيارة امته تضربه الا توة او كان ضرباته السيارة او هوه ماشى ايجيب الخبزة تلقى امه تقول شوقنى الخبزة او تبدا تتمنى فى الموت


هادى وجهة رائى

[MAD_MAN]

هادى وجهة رائى
كلامك واقعي
بس نقولك على شي
الله اعلم بس هكي انا نشوف فيه
لما يموت الشخص نتدكروا ليه كل حاجة كويسة
ما نتدكروش بانه كان مش كويس او كان هكي او هكي
اما بالنسبة للام
انا سامع قصص من الناس بانه لما مات ولدها طلعت تزغرت في الشارع
لانه ولدها كان مش كويس
بس فيه هكي وفيه هكي
اما عن القضاء والقدر
احترامي للنساوين مش مقتنعات بيه مهما كانوا
في اللحظة الاولى تبدا تعيط وتلطم بعدها تقولك كلام منافي جدا للدين زي ما قلت
ياريتني ما بعته يبجيب خبزه
شوقني الزيت
شوقني الطماطم
حاجات زي هكي
======
خليك على جنب
انا هدا الشي قدامي
فيه من نساوين قالولها بوك مات
خشت للدار وحطت ايدها في وجهها
وقعدت تعيط بس من غير صوت
ولا قالت اي كلمة
مش لانه بوها كان مش كويس ولا اي حاجة (لا) لآنها صبورة
هادم النساوين الصح

[BLOODY ROAR]

كلام جميل او واقعى يا ماد

بس المشكله هادى مش فى الموت بس حتى المرض

احيانا تاتى الأقدار بما لا يوافق أهواءنا، وتكون الابتلاءات التي تستلزم منا الصبر الجميل او ياريت ماننسوش قول الرسول صلى الله عليه وسلم عندما قال (( ادا احب الله عبدا ابتلاه ))

[MAD_MAN]

كلام جميل
الشي المعروف بانه النساوين حساسات شوية ومن الحبة قبة يديروا
مش عارف الواحد أمتى يتوقفوا عن اللطم والجو هذا
لكن حتى الراجل ليه دور
لما يقوللها تسكت تضم فمها وتقعمز المفروض
لكن لو كان راجلها مرخي
والجو هذا
تلقاها تغني وتلطم وتمزق وتريش تقول لو دارت الشي هدا رح يرجعلها ولدها او راجلها او خوها
أبدا
وهذا والله اعلم ( خشينا في موضوع ديني شوية )
يعني الشي اللي يديروا فيه حرام 100%

والرجل الصابر يقول بس ( حسبي الله ونعم الوكيل ) او ( ان لله وان اليه راجعون ) بس
فيه من ناس انا شفتها
بعيني لما جتها المصيبة بالطريقة هادي
اي نعم يدمعوا عيونه
لكن تلقاه صابر وتلقاه يعول حتى باش يجيب الخيم
وما الى دلك
وان شاء الله نكونوا من الناس هادوا ( فبشر الصابرين )
لأنه والله اعلم
ربي يمتحن في قوة ايمانك

[جليسة البحر]

كلامكم سليم والحمد الله نفسي مؤمنة بالقضاء والقدر ايمانا كاملا

قال تعالي (كل نفس ذائقة الموت )

فالله لايسال عمايفعل ولا تقل " لو أني فعلت كذا وكذا لكان كذا وكذا، ولكن قل: قدر الله وما شاء فعل".

وان شاء الله انكونوا من اهل الصابرين والمبشريين بالجنة

: مهما كان عمر الشخص حتي ولو كان مريض مهما كان عزيز علينا من لافضل لينا الدعاء له بحسن الخاتمة (( اللهم

اعطنا حسن الخاتمة )) وتباته عند السؤال لان الله (( سبحان ولاقوة الا بالله ))قال ( يا أيتها النفس المطمئنة ارجعي إلى

ربك راضية مرضية فادخلي في عبادي وادخلي جنتي )إن الله العلي القدير إذا أراد أن يقبض روح عبده المؤمن وهي مؤمنة

من يرد الله به خيراً يصبه فإن الله قد قدر والقضاء قد حل،فعل المؤمن كما هو ملتزم بيدينه وصلاته يجب ان يلتزم بالصبر

والطمأنينة

[جليسة البحر]

كلام جميل
الشي المعروف بانه النساوين حساسات شوية ومن الحبة قبة يديروا
مش عارف الواحد أمتى يتوقفوا عن اللطم والجو هذا
لكن حتى الراجل ليه دور
لما يقوللها تسكت تضم فمها وتقعمز المفروض
لكن لو كان راجلها مرخي
والجو هذا
تلقاها تغني وتلطم وتمزق وتريش تقول لو دارت الشي هدا رح يرجعلها ولدها او راجلها او خوها
أبدا

ايه صح هما حساسات لكن صدقني الدور مش في راجلها فالدور لاساسي في الموجودين والواقفين معاها في هاديكا لحظة لان الي تخش بدل ماتعزي وتصبرها وتهديها تلقاها اتقوللها في كلام ازيد يشعل نارها ويخليها تعيط وتخبط ، لان راجلها مستحيل اكون مقعمز معاها طيلة الوفات كلها ،

خليك على جنب
انا هدا الشي قدامي
فيه من نساوين قالولها بوك مات
خشت للدار وحطت ايدها في وجهها
وقعدت تعيط بس من غير صوت
ولا قالت اي كلمة
مش لانه بوها كان مش كويس ولا اي حاجة (لا) لآنها صبورة

تصدق كلام لقولته في لاقتباس كانك تتكلم عليا والله العظيم ::حناي الله يرحمها ماتت قدامي وبين اديا وبروحنا اني وياها في الحوش سكرات موتها ولحظة موتها كلها وهي بين اديا تخايلوا في هديكا للحظة مانشوف في شئ قدامي الا و كأن شريط يمشي بين عيوني مكتوب فيه ( اشهد ان لا اله الا الله واشهد ان محمد الرسول الله )) وانقول فيها بصوت عالي والحمد الله شهدت معاي لين ربي استلم امانة وطيلة العزي مابكيتش بعياط عالي والا تلطيم لا لا كنت صابرة والله صابرة لابعد حد لدرجة الكل حاير فيا كيف ماعيطش ، لكن في كلمة وجعتني وحسيتها في يوم الجنازة من وحدة جارت حناي قالت حناها مش واجعتها ومش حاستها بكل
والله نضتلها وقولتلها قدام الناس وبصوت عالي ان الله مع الصابرين . حسبي الله ونعم الوكيل ووليت قعمزت كأن ماصار شئ تكنطت قعدت شوية وروحت منها معادش ريت وجها الي حد الان ؛ والوجع والحزن في القلب مش في تعابير الوجه


والحمد الله علي كل حال اللهم ارحمم المؤمينين والمؤمنات منهم لاحياء والاموات

[لولو كاتى]

ربى يرحمها فى الجنة ان شاء الله

حتى انى منحبش العياط بالصوت العالى الحمد الله دموع بس ربى يجعلنا من الصابرين

الحمد الله مؤمنة جدا بالقدر والنصيب وبعدين قن ومادمان علاش تحطو

فى اللوم على النساء بس حتى انتم فى هلبااااااااا هكى وبعدين الموضوع حصرتوه فى الموت بس

القدر فى كل شى حتى فى الحاجات الحلوة

ومشكور قن على طرحك للموضوع

[BLOODY ROAR]

تفاعلكم جميل جدا ما شاء الله

..................................

بالنسبة الى لورد احنى ماشددناش على موضوع الموت لا احنى بس حبينا نعطو كل موضوع حقه او بعدين الموضوع هدا جارى لمدة اسبوع يعنى حنتناولو عدة مواضيع منها القضاء والقدر فى العمل او فى الحب والمعاملة الاسرية او غيرها

........................

انى توة نبى نتوجه للقضاء والقدر فى الحب

نبى نعطيكم مثال قبل كل شى

انى نعرف بنت صديقة المهم كانت تحب واحد لدرجة لو قلتلكم الجنون شوية المهم بعد 5 سنين قصة حب سيبها الراجل بعد ما تفاهمو حتى على العرس امته المهم هوه فاتها او سافر وبعتلها رساله قاللها انه خلاص مش حيرجع تانى او انه حيرتبط بوحده من غادى

المهم هيا قريب هبلت او حاولت تنتحر اكثر من 6 مرات

نبى نعطى ملاحظة صغيرة قبل مانكمل كلامى

انه البنت هادى لو كان ايمانها بربى كبير او مؤمنة بالقضاء والقدر ما كانتش وصلت للى وصلتله

تخايلو مع عدم ايمانها بالقضاء والقدر حاولت حتى تنتحر او هدا فى حد ذاته كفر

اللى نبى نوصلهولكم انه مرات حاجات بسيطة تخلينا نطيحو فى حاجات اكبر مما كنا متوقعينها

او زى ما قال ماد مان انه خشينا فى مواضيع دينية فهدا اكيد لانه كل شى مرتبط بالدين لانه لو البنت هادى كانت من المصليين والله ماكان صار فيها هدا كله او للعلم ديمه تلقى الناس الصابرة من المصليين والناس اللى ماعنداش ايمان بالقضاء والقدر تلقاها كلها من الناس اللى لا تصلى ولا تقرا قران ولا عندهم اى معلومات بسيطة على الدين

(( الحمد الله على نعمة الاسلام ))

المهم خلى نكملكم البنت هادى قعدة 3 سنين تتوجع من الازمة اللى مرت بيها او توة رافضة بتاتا انها ترتبط باى شخص وانها بتقعد من غير زواج
والمشكله انه بعد ايام معدوده لقيت تناقد كبير جدا فى كلامها انه قالت مانبيش نرتبط بحد او هيا يوميا تتعرف على شباب ونحرفت انحراف شديد او ضاعت البنت (( نسئل الله ان يهديها ))

ريتو انه من قصة حب اصبحت فى مواضيع تانية

[MAD_MAN]

سبحان مغير الاحوال
أولا المفروض تعرف معنى الاية الكريمة (عسى ان تكرهوا شيئ ً وهو خير لكم )
وهذا الشي واقعي 100%
احتمال لو تزوجت من الرجل هدكاي راهو طلع خاين مثلا
وكل يوم مع واحدة
وبعدين طلع يشرب وكرها في عيشتها
في النهاية بكل يطلع ما يجيبش وبعدين تعيش لا حية ولا هي ميتة
والله اعلم حكمة من ربي خل يالشخص هدكاي يطلع من حياتها
ممكن كان بيبدلها بشخص ثاني احسن منه
بس الباين انها خرجت عن طريق الصواب

الله اعلم السنين شنو رح تخبيلها

[BLOODY ROAR]

مشكورين على التفاعل او ياريت الكل يعطى امثله بحيث يقدر ايفيدنا فى الموضوع هدا

[جليسة البحر]

اوكي شن رايكم نتكلموا علي تاخير زواج البنت وهلبة اقولوا اكيد سحر

خلونا انخشوا لي لب الموضوع



في هلبة بنات افوتوا سن 35 تلقا امها تقول لا اكيد بنتي امدايريلها سحر لازم نرفعها للشيخ بش تتزوج ويجيها نصيبها هادي متعرقنا

علاش مايقولوش هدا نصيب من ربي لان اكيد لو مش كاتبلها نصيب في زواج تلقاها عندها نصيب في حاجات تانية متلا الجمال والغني و

.....الخ واحني نعرفوا اكيد السحر والشعودة موجودين لكن مستحيلة يقدروا اجيبوا النصيب او الزوج للبنت








باقي الحديت ليكم

[جليسة البحر]

مادمن ياريت اتبت الموضوع بجديات عجبتني الفكرة

[BLOODY ROAR]

هيا المشكلة الحالية هيا بسبب الانحلال والغزو الثقافى اللى جانا من الغرب

اللى صار الفترة الاخيرة انه البنات الصغار يتجوزو والكبار قعدو والسبب هدا انه البنات توة الصغار قلدو الغرب فى كل شى او تحديدا فى اللبس والعادات اللى هيا تمثل الانحلال والسبب هدا خلى الشباب او الرجال يشبحو البنت العادية انها ممله او عاداتها قديمه وينفرو منها حتى المتزوجين تلقوهم بصغارهم ويتجوزو وحده تانيه صغيرة

[BLOODY ROAR]

موضوع اليوم


الشك





يلا تفاعلكم شباب

[لولو كاتى]

والله ياقن ضربت على الوتر اصعب حاجة فى الدنيا كله الشك خاصتنا فى العلاقات

[جليسة البحر]

( يَا أَيُّهَا الَّذِينَ آمَنُوا اجْتَنِبُوا كَثِيراً مِّنَ الظَّنِّ إِنَّ بَعْضَ الظَّنِّ إِثْمٌ )


الشك يتولد من عدم التقة و الدوران في حلقه مفرغه وهو اصعب حاجة ويسهل لتدمير الحياة بين شخصين سواء زوجية او عاطفية

وهو اندماج بين الاعصاب والعناد والغيرة

[MAD_MAN]

اوكي شن رايكم نتكلموا علي تاخير زواج البنت وهلبة اقولوا اكيد سحر

خلونا انخشوا لي لب الموضوع



في هلبة بنات افوتوا سن 35 تلقا امها تقول لا اكيد بنتي امدايريلها سحر لازم نرفعها للشيخ بش تتزوج ويجيها نصيبها هادي متعرقنا

علاش مايقولوش هدا نصيب من ربي لان اكيد لو مش كاتبلها نصيب في زواج تلقاها عندها نصيب في حاجات تانية متلا الجمال والغني و

.....الخ واحني نعرفوا اكيد السحر والشعودة موجودين لكن مستحيلة يقدروا اجيبوا النصيب او الزوج للبنت








باقي الحديت ليكم


معليشي رح نرد على النقطة هادي قبل
اولا من البنات ؟
علاش لانه اللي تتزوجها ما تبي ظرة معاها ومن الطبيعة انه لو الواحد تزوج 1,2,3 معاش رح تقعد بنت عانسة بكل
وما فيش حد فوق سنو مش 35 فوق سن 30 عانسة
وبعدين وضعنا الاجتماعي والمعيشة
وهدا شي واضح وضوح الشمس حنى ليبيين ونعرفوا الشي هدا
وبعدين الشباب الليبيين قريب نصهم مسافرين لبرة ومتزوجين
اكيد بالطريقة هادي رح يكثروا العوانس
وبعدين خلينا مش الشي الثاني وهو السيارات والحوادث الغريبة اللي في بلادنا تلقى واحد ماشي في السريع بسرعة معقولة تنقزله سيارة من السريع المقابل ويصير نطح كباش
وناس تموت فيها معضمهم شباب
المفروض المراْة م اقبل ما تقول خيرها بنتي عانس
تشد تقرأ جريدة قبل ما تمشي في متاهة التخلف
وتقول بنتي مدايرلها كتيبة
وتمشي في متاهات ثانية وتظلم بيها ناس وتدخل ناس لآشياء ماليها دخل

[BLOODY ROAR]

:129::129: هيا لكن وجهة نظرك

ان شاء البنات ياخدو بيه الكلام هدا لانى انى الاول مادابيا ناخد 4:129:

[BLOODY ROAR]

لو خيروك بين هالسؤالين..؟؟؟


أيهما تختار ...؟؟
.
.
.

أنسان تحبه ويخونك........ ؟؟



أو



أنسان تحبه فيمووت........؟؟






موضوع يستاهل النقاش

انتظر ردودكم ...

[جليسة البحر]

اني ماعنديش فرق في السؤالين لان في كلتا الحالتين خسرته سواء بالموت او بالخيانة .

ولكن من اجل النقاش راح نختار السؤال ((أنسان تحبه ويخونك........ ؟؟))

اولا : الموت علينا حق .

تانيا : هو صحيح موت اهون علي من الخيانة لانه بعد موته اكيد راح تموت معاه كل لاحزان والالام

وللكن مش راح نتمناله الموت ابدا بما اني نحبه بالعكس نتمناله الحياة السعيدة رغم عدابه ليا وسيوره اجي يوم وننساه

وزي مايقولوا الي يبدلك بالفول بدله بقشوره

[BLOODY ROAR]

رد جميل يا جليسة

ياترى شنى راى باقى الاعضاء:19:

[بينا]

راي مع جليسة ماعنديش فرق في السؤالين لان في كلتا الحالتين خسرته سواء بالموت او بالخيانة

الموت: علينا حق وكل نفس ذائقة الموت.

الخيانه: تكسر القلب وتخلي الانسان مش بسهل يعطي ثقة في اي حد.

اصعب احساس يمر بيه الانسان الخيانة ولكن اهون من الموت
ولم تكون تحب حد مستحيل تكره ومستحيل تتمناء ليه الموت لانه كان في قلبك

[جليسة البحر]

بينا بلا تنقيل مني عيونك في ورقتك :129:



قن : وانت شن جوابك:19: حتي كان تتمناله الموت عادي عادي ماتتحشمش قول:129:

[BLOODY ROAR]

انى نختار

أنسان تحبه فيمووت........؟؟

لانه الشعور هدا ماجربتاش وعارف انه حتى مجرد التفكير فيه صعب لكن انى هنايا نشوف انه هنايا حيكون حب صادق وفيه اخلاص وذكريات حلوة للنهاية لانه لما الشيخص يموت ينتهى كل شى الا الحب...مش عارف هادى وجهة نظرى


اما
أنسان تحبه ويخونك........ ؟؟
فمريت انى بالتجربه هادى صعبه تخليك تفقدى الثقه فى الناس كلها وتولد الحقد مع الوقت والكره وفى بعض الاوقات تطور للقتل