[جليسة البحر]

- احكيلنا علي احدي مغامراتك ؟

قبل لما كنت صغير
كنت انا وولد اسمه لطفي
شياطين هلبا
كانت عندي بشكليطة وهو لا
قريب كل يوم في الليل حوالي الساعة 3 في الصيف نجروا وراء كلاب البلدية
المهم
مرة من المرات واقفين نهدرزوا ونضحكوا في الطريق المهم فيه مجموعة قريب 7 كلاب شبحهم لطفي ناشبهم
وانا عاطي ضهري لجهة الكلاب هدوكماي
المهم الكلاب مشوا هربوا لجهة تحت العمارة
وتحت العمارة فيه عصابة كلاب ثانية
المهم لما ناشبهم انا راكب على البشكليط وعاطي ظهري للكلاب شفتهم لما هربوا
وبعدين قعدت نهدرزوا ونضحكوا
وانا نشبح للطفي هدا
في وجهه وانا في نص الهدرزة
هوا عيونه زي الصينيات
لما شبحلي وعيونه مفتوحات
عرفت بانه فيه وراي حاجة
طبعا هوا ما قال اي شي
طلع يجري على طول
وانا قاعد ما تلفتيش وراي
لانه من عيونه معناها فيه حاجة مش عادية جاية جيهتنا
من غير ما نتلفت
ركبت على البشكليط وطلعت نجري
اولى ثانية في مكانها
وبعدين تلفتت نشوف شنو فيه وراي
لقيت مش اقل من عشرة كلاب يجروا في جرتنا
تلفتت لقدام
وبسرعة لحقت على لطفي
لطفي وهوا قاعد يجري وانا خاطم من بحداه
تلفتي ولما شافني نبي نفوته
قالي وعيونه زي اللي مليانات دموع
ركبني ركبني ركبني معاك
وشد في الدومان

طبعا انا قتله حول حول ايدك
وعيوني للقدام

المهم قعد يشح في الدومان جيهته
وانا نرده جيهتي
طبعا اختل توازني وانقلبنا فوق بعضنا وصوت الصياح والخبط
واتشكلنا انا واياه في البشكليط
طبعا في لمح البصر ومن الخوف واحنى متشكلين في البشكليط
عرفتوا سوبرمان لما يطلع يطير ؟؟
انا هكي طلعت طيران جري
وكاني لبنى السريعة

لما فتت مشوار طويل تلفت وراي لقيت لطفي قاعد متشكل في البشكليط
والكلاب من الدوشة اللي صارت خافوا ولوا يجروا

لما مشيت للطفي نشوفه
قعدت نعارك فيه على انه كيف يشح دومان البشكيط ؟
وكيف يجري وما يقوليش بانه فيه كلاب وراي ؟

على العموم لما وقف
ضحك ضحكة
الجيران كلهم ناضوا
وقعدنا نتفكروا كيف جرينا وكيف طحنا وكيف طلعت انا زي سوبرمان من البشكليط
قعد يقولي نبي نعرف كيف سلكت رجليك من البشكليط ؟

شنو بنقوله من الخوف ؟

يعطيك الصحة وخلاص

والله ضحتني

والحمد الله عالسلامة مؤخرا