السلام عليكم
نلاحظوا يوم عن يوم يزيد مستوي إرتفاع الدروس الخصوصية وكثرتها
في جميع التخصصات لمختلف الأعمار
إبتدائي.إعدادي ..تانوي..وحتي جامعي
واتجي تشوف الأسعار مبالغ خيالية يعني ماتعرفش هل الوقت وين إتحط القرش إمتاعك
يعني شنو العلم عندنا نقص ولا أساتذنا معاش ينفعوا ولا ضمائرهم ماتت ولا أبنائنا ادللولوا
نجوانقسموهم:
العلم
ماشاء الله إيزيدوا يوم عن يوم في المنهج وفي الطرق الحديثة ليه حتي كان صعبة لاكن مابي خلونا متأخرين عن الشعوب التانية
المدرسين
نمطين
1- الكويس اللي يشوف من حال روحا وخواتا في البيت ويعطي الطالب بضمير وهذايمتل الأغلبية إنشاء الله....
2-والتاني ربي يهديه أعصاب وضرب ومن الأخير خش معايا درس خصوصي تنجح
أبنائنا
1- مستواه ضعيف ويبي ينجح وبوه وأمَ يبوه ينجح بيضغطوا علي روحهم وبيدخلوه الدرس الخصوصي
2-مستواه معقول ولاكن خايف من المدرس فا بيدخل معاه الدرس بيش ينجح
3-مستواه مرتفع لاكن كيف ماخشوا اللي معاه بيدخل زيهم فا بيدخل للدرس
4-مانجحج السنة اللي فاتت مابيدخل يقعد حتي السنة هدي بيدخل درس خصوصي
5- البو والأم متريحين وعندهم اللي يدخلوه بيه هوا وإخواتا وحتي يستريحوا من دوشتا فا بيدخلوه للدرس الخصوصي
الأسعار:
من 30 دينار الي 3000دينار
طبعا علي إختلاف الفئات الدراسية
يعني 30 و40 الابتدائي
والألاف جامعي
وفي الأخير من المظلوم؟
طبعا الأب والأم اللي عايشين بيش يسعوا إنهم يوفروا المبلغ علي نهاية الشهر لتسديده وهذا اللي حاصل هذه الايام
فاإنشاء الله ربي يعينهم